Кәсіпкерлер облыс әкімінің орынбасары Арслан Дандыбаевпен кездесуде әкімшіліктен «жол картасын» әзірлеп, онда мектептер мен балабақшалар салу қажеттілігі туралы барлық ақпарат көрсетілуін сұрады.
«Қандай балабақша салынады, қай жерге мектеп керек, соның бір «жол картасы» жасалынса, әрбір ауылда қай жерге керегі айтылып. Өйткені біз керек ақпаратты ешқандай жерден ала алмаймыз», – деді кездесу барысында «Дана» жекеменшік мектебінің және «Еркем-ай» балабақшалар желісінің құрылтайшысы, Bilim INVEST Ұлттық білім беру инвесторлары қауымдастығының вице-президенті Күләнда Батырбекова.
Ол бұл ұсынысты білім беру саласында тәжірибесі бар облыстың инвесторлар тобы қолдайтынын атап өтті.
Сондай-ақ, кәсіпкер жер учаскелерінің жоқтығынан балабақшаларды стандартқа келмейтін, жалға алынған коттедждерде ашуға мәжбүр екенін айтты.
«Біз бәріміз үш ауысымда оқыту, жалға алынған коттедждерге балабақшаларды орналастыру мәселесін көтеріп отырмыз. Біздің ұлт мынадай стандартқа сай, әдемі, жақсы салынған балабақшаларда өсіп өнуі керек. Өйткені бұл халықаралық деңгей. Мен өзім инвестор ретінде айтар едім, біздің білім ұйымдары білімді жаһандық стандартпен, ал тәрбиені ұлттық қып беріп жатырмыз, осыған бәрімізде ат салысуымыз керек. Сол үшін Алматы облысында қай жерге мектеп салынуы керек, білсек. Акиматқа жазамыз, ешқандай жауап жоқ, 3-4 жыл болды, қай жерде жер бар екенін айтыңдаршы деп. Мен сол мәселені көтеріп отырмын. Кәсіпкерлерді қолдап отыратын сіздер ғой. Сондықтан мен осыған көмектессеңіздер деймін», – деді кәсіпкер.
Батырбекованың ұсынысына әкімнің орынбасары келесідей жауап берді:
«Денсаулық сақтау және білім беру нысандарына арналған жер – бірінші орындағы мәселе. Балабақшалар, мектептер, тіпті жеке университеттерді сала алатын және одан әрі басқара алатын инвесторларды тартуымыз керек. Сондықтан жер мәселесін шешетін боламыз. Қандай қажеттілік болса, сізге көмектесуге дайынбыз», – деді Дандыбаев.
