Өңір басшысының пайымдауынша, соның салдарынан ет өндірісі екі есе төмендеп кеткен.
«Империя Фуд» ЖШС былтыр 1400 тонна өнім өндірсе, 2022 жылдың 10 айында тек 700 тонна ет өндірген», – деді Марат Сұлтанғазиев.
Бұдан былай мәселе облыс әкімінің бақылауында болады. Ширақ әрекетті талап ететін тағы бір мәселе – пайдаланылмайтын жерлер. Марат Сұлтанғазиев осы бағытта да жұмысты күшейтуді талап етті.
«Мониторинг барысында 195 мың гектар пайдаланылмайтын ауыл шаруашылығы мақсатындағы жерлер анықталды. Оның небары 25 мың гектардан астамы мемлекетке қайтарылды. Бұл жұмысты жалғастыру керек», – деді ол.
Марат Сұлтанғазиев аудан әкіміне өзін-өзі жұмыспен қамтыған азаматтарды ынталандыру шараларын жедел қолға алуды тапсырды. Оларға шағын несиелер мен гранттар беру арқылы қолдау керектігін айтты. Қазіргі уақытта Жамбыл ауданында өзін-өзі жұмыспен қамтып отырған азаматтар саны 23 мыңнан асады.
Ауданда бұдан былай тұрғын үй құрылысы да қарқын алмақ. Өңір басшысы Жамбыл ауданы әкіміне жекеменшік баспана тұрғызуға арнайы жерлер бөліп, оларды қажетті инженерлік инфрақұрылыммен қамтамасыз ету қажеттігін баса айтты.
