3180,42 шаршы метр аумақты алып жатқан нысан үш қабатты және екі корпусында арнайы лифтер орнатылған. Заманауи техникамен жабдықталған мектепте химия-физика және информатика кабинеттері, ұлдар мен қыздарға арналған технология сыныптары бар. 84 адамға шақталған акт залы, басқа да қажетті материалдық базамен толықтай қамтамасыз етілген. Сондай-ақ, мектеп ауласында футбол алаңы, жүгіру жолақтары мен волейбол, баскетбол сынды спорттық алаңқайлар орнатылған.
«Біздің бұрынғы мектебіміз 180 орынды әрі өте ескі болатын. Балалар сыймай, оқуына кедергі келетін. Спорт зал, басқа да жағдайлар жасалмаған. Міне, енді аудандағы ең жаңа, керемет мектеп бізде. Өте қуаныштымыз», — дейді ауыл тұрғыны Руслан Мұстапаев.
Жаңа оқу жылы қарсаңында Басқұншы ауылында 53 бүлдіршін мектеп табалдырығын аттайды.
«Жаңа оқу жылы қарсаңында бұдан бөлек Сарыбел ауылындағы орта мектептің күрделі жөндеу жұмыстары аяқталып, пайдалануға беріледі. 732 млн теңге бөлінген мектеп толыққанды материалдық базамен жаңартылып, мектеп ауласы спорттық алаңдармен толықтырылды. Бұдан бөлек бірнеше мектептер жаңадан салынып жатыр», — деді әкім Марат Сағымбек.
Жалпы Панфилов ауданында 50 мектеп бар. Биыл өңірде 26 548 бала мектепке барса, солардың 2 900-ы жаңа мектеп табалдырығын аттағандар.
