Тұрғынның айтуынша, Мемлекет басшысы Алматы облысының ауыз су мәселесін шешу туралы тапсырманы бергелі бірнеше жыл өткен. Алайда, бұл мәселе әлі жүйелі түрде шешілмеген.
«Біз Бесағаш ауылындағы «Бурабай» шағын ауданында тұрамыз. Бірақ жергілікті әкімдік су тарту проблемасын шешпеген соң, 2018 жылы «Тасқынсу» ЖШС-мен келісімшартқа қол қойып, өз-өзімізді сумен қамтамасыз ете бастадық. Қазіргі таңда бұл серіктестік қарызға батып қалған. Сол себепті су белгілі бір уақыт кестесімен беріліп жатыр. Мәселеміз қашан шешіледі?», — деді тұрғын.
Облыс әкімі бұл түйіткілдің бар екенін жасырмады. Оның айтуынша, мұнда шағын аудан тұрғызбас бұрын судың қуаттылығы есептелмеген.
«Бұл ауданда су желілерінің тозуы 57%-ды құрайды. Әрине, судың қуаттылығы да жеткіліксіз. Сол себепті біз Бесағашта 9 және 12 қабатты үй тұрғызуға тыйым салдық. Сіз тұрып жатқан шағын ауданның құрылысы басталарда тиісті есптеулер жасалмаған. Талғар ауданының 75 шақырым су желісіне жөндеу жүргізілетінін айта кеткен жөн. Нәтижесінде 15 000 тұрғын сумен қамтылады», — деді аймақ басшысы Марат Сұлтанғазиев.
Ал аудан әкімі Танат Айдарбеков Бурабай шағын ауданының мәселесін шешу мақсатында жобалық-сметалық құжаты дайындалып жатқанын айтты. Жалпы жоба құны 6,6 млрд теңге.
