Аталған шағымдар бойынша Алматы облысының әкімі арнайы барып, жобалардың орындалу барысын тексеріп, жергілікті тұрғындармен кездесті. Боралдай тұрғындары соңғы жылдары аяқталмай келе жатқан инженерлік желілердің салдарынан жолдардың ойылып, жүру қиындағанын айтты.
«Черёмушканы қазып тастады. Канализация, су деп жүргендеріне бес жыл болды, әлі бітіре алмай жатыр», — деді ауыл тұрғыны Раушан Өтепбергенова.
Тағы бір тұрғын Наталья Аношкина: «У нас перекопали весь поселок. Весь асфальт подняли. Мы ходим вот в такой вот грязи. Наши школьники добираются ужасно до школы», — деп наразылығын білдірді.
Тексеру нәтижесінде анықталған олқылықтар мен кемшіліктерден кейін құрылыс жұмыстары уақытша тоқтатылып, жоба қайта қаралатын болды. Әкімнің тапсырмасына сәйкес, құрылыс тек түзетілген жоба бекітіліп, барлық талаптар сақталған жағдайда ғана жалғасады.
«Тұрғындарға ыңғайсыздық туғызбай жасауға болатын жерлерде жұмыстарды жалғастырыңыздар. Ал қалған жерлерде жобаға түзету енгізгенге дейін жұмысты тоқтатыңдар. Жобаны түзетуші маманды шақырып сотқа беріңдер. Қажет болса лицензиясынан айырылсын. Себебі, мұндай жұмыс болмайды. Қазір жұмыстың тағы бір жері аяқсыз тоқтап қалса, ертең балалар мектептен, ересектер жұмыстан қалады, біреулер ауруханаға жете алмай қалуы мүмкін. Ең бастысы — жолды қалпына келтіріп, тұрғындардың жайлылығын сақтау керек», — деді өңір басшысы Марат Сұлтанғазиев.
Тұрғындардың өтінісін назарға алған әкім жобаны кезең-кезеңімен жүзеге асыруды, балама көшелерді алдын ала дайындап, негізгі жолдарда қозғалысты толық шектемеуді тапсырды.
Сонымен қатар, кездесуде ауыл халқының өтініші бойынша Боралдай кентінде жаңа саябақ салу жобасын әзірлеу және оған қажетті жер телімін заң аясында қарастыру жөнінде нақты тапсырма берілді.
Облыс әкімі атап өткендей, басты мақсат — инженерлік инфрақұрылымды жаңарту барысында тұрғындардың қауіпсіздігі мен күнделікті өмір сапасына зиян келтірмеу.
