«Шәріпов пен Гоголь көшелерінің қиылысының солтүстігінде болған жылу трассасындағы апаттың салдары жойылды. 11 қарашаға қараған түні сағат 01:50-де «Алматы жылу желілері» ЖШС бригадасы диаметрі 400 мм құбырды жөндеп бітті. Сынақ жүргізілгеннен кейін жылу магистралі пайдалануға берілді және түнгі сағат 2:40-та жылу бірқалыпты беріле бастады әрі белгіленген режимде жұмыс істеп тұр. Сондай-ақ көлік қозғалысына да рұқсат», — деп хабарлады Алматы қаласының энергетика және сумен жабдықтау басқармасы
Басқарма мәліметінше, асфальт жабындысын ауа райы қолайлы болған жағдайда осы жылдың 13 қарашасына дейін жөндеу жоспарланып отыр.
«Кенеттен төтенше жағдай туындаса (су, бу шығарындылары) «АлТС» ЖШС диспетчеріне +7-727-378-06-65 телефонына хабарласу қажет. Өз бетіңізше әрекет етпеңіз және бірден хабар беріңіз», — деп ескертеді ведомстводан.
Еске салайық, кеше Алмалы ауданында Гоголь көшесінен төмен Шәріпов көшесінің бойында құбыр жарылған еді.
Коммуналдық апат салдарынан 67 көппәтерлі және 2 жеке үй, 6 білім нысаны және 20-дан астам басқа нысандар уақытша жылусыз қалған болатын.
Соңғы жылдары бұл аумақта құбырдың тозуына байланысты 17 апат болған, бүгінгісі — 18-ші оқиға.
