«Мектеп автобусы» пилоттық жобасы Алматы қаласының әкімі Ерболат Досаевтың тапсырмасымен жүзеге асырылды және Қазақстандағы мұндай ауқымды жобаның алғашқысы. Жобаны жүзеге асыру аясында «АлматыЭлектротранс» ЖШС Алматы қаласы білім басқармасының көмегімен 100 мектеп автобусын (оның ішінде 21 орындық 50 автобус және 40 орындық 50 автобус) сатып алды. Автобустар кішкентай және мектептен шалғай тұратын оқушыларды тасымалдайды», — деп хабарлады Алматы әкімдігінің баспасөз қызметі.
Мысалы, №210 мектеп-лицейіне «Байбесік» шағын ауданынан 222 бала, «Ұлжан-2» шағын ауданынан 148 бала тасымалданады. №200 мектеп-гимназиясына Абай саяжайынан 241 оқушыны тасымалдайды. №162 мектеп-гимназиясына «Жас Қанат» шағынауданынан 175 бала, ал №183 жалпы білім беретін мектепке «Асқартау» шағынауданынан мектеп автобусы 76 оқушыны алып келеді. Мектеп автобустары барлық халықаралық қауіпсіздік стандарттары мен техникалық талаптарға сәйкес келеді: апаттық шығу, қауіпсіздік белдіктері, мүмкіндігі шектеулі балаларға арналған пандус, өрт қауіпсіздігі жүйесі бар.
Алматы қаласы әкімінің орынбасары Әсем Нүсіпованың айтуынша, әр мектеп бойынша маршруттық парақтар әзірленді. Бұл мектепке дейін жеткізуді қажет ететін барлық баланы қамту үшін жасалады.
«Бүгінгі таңда балаларды отырғызып, түсіруге арналған арнайы аялдамалар бар. Сол бағыт бойынша оқушылармен бірге арнайы мұғалімдер де еріп жүреді. Жобаны ары қарай дамыту кезінде онымен 12500 бала қамтылатын болады. Біздің есебімізше 1-11 сынып оқушылары арасында осынша бала санына мектепке қатынау үшін мектеп автобустары қажет», — деді ол.
Алматы қаласы білім басқармасының басшысы Ләззат Жылқыбаева 30 мектептің барлығында оқушыларды тасымалдауға келісім-шарт жасалған. Бұл үшін бюджеттен 1,4 млрд теңге қарастырылғанын айтты.
«1 қыркүйектен бастап барлық автобус тиісті қауіпсіздік шараларын сақтай отырып, бекітілген маршруттар бойынша балаларды тасымалдайды. «Мектеп автобусы» жобасын жүзеге асыру оқушылардың қауіпсіздігін қамтамасыз етеді», — деді Ләззат Жылқыбаева.
Айта кетейік, Алматыда «Мектеп автобусы» жобасының екінші кезеңін іске асыру үшін қалалық мобильділік басқармасы 2024 жылы қосымша 50 автобус сатып алуды жоспарлап отыр.
