Министрдің айтуынша, қазіргі таңда елімізде медициналық мекемелердің жаңа аппараттармен қамтылуына ерекше көңіл бөлініп отыр. Мәселен, «Ауылда денсаулық сақтауды жаңғырту» ұлттық жобасы аясында Қазақстандағы аурухана, емхана секілді мекемелерге 965 дана заманауи жабдықтар табыс етіледі. Оның ішінде, Алматы облысына 84 жабдық беріледі.
Сондай-ақ министр осы жоба аясында инфаркт, инсульт, жарақат және басқа да жағдайлар кезінде шұғыл медициналық көмек көрсете алатын, сондай-ақ ірі қалаларға барудың қажеттілігінсіз, оның ішінде телемедицина және басқа да мамандандырылған және жоғары технологиялық медициналық көмек көрсете алатын 32 ауданаралық аудандық орталық ауруханаға күрделі жөндеу және реконструкция жүргізілетінін айтты. Ал Алматы облысында 2 ауданда ауданаралық орталық аурухана ұйымдастыру жоспарланған (Қарасай, Еңбекшіқазақ аудандары).
«2023 жылы ұлттық жобаны іске асыру шеңберінде 307 медицина қызметкері, оның ішінде 54 жалпы практика дәрігері, 253 орта медицина қызметкері даярланады. Жоғарыда аталған іс-шараларды іске асыру нәтижесінде 2023 жылы мамандандырылған медициналық көмекпен қосымша 2,4 млн. астам ауыл тұрғыны қамтамасыз етілетін болады», — деді министр.
Бұдан бөлек, аталған жобаның шеңберінде 655 медициналық-санитариялық алғашқы көмек объектісін, оның ішінде Алматы облысында 38 нысан салу жоспарланып отыр.
