Кездесу барысында 15 наурызға жоспарланған республикалық референдумға ұсынылатын жаңа Конституция жобасының негізгі бағыттары түсіндірілді. Атап айтқанда, билік тармақтарының тепе-теңдігі, бір палаталы Құрылтай институтын енгізу, Конституциялық Соттың тәуелсіздігін күшейту және Президент өкілеттігінің бір реттік жеті жылдық мерзімі мәселелері талқыланды.
Коалиция мүшесі Жанболат Жөргенбаев жаңа конституциялық өзгерістердің басты мақсаты саяси жүйені сапалық жаңа деңгейге көтеру екенін айтты. Оның сөзінше, Президенттің бір реттік жеті жылдық мерзімге сайлануы және қайта сайлана алмауы – саяси тұрақтылықты қамтамасыз ететін маңызды қадам.
«Мұндай шешім биліктің тұрақтылығын нығайтып, саяси жүйенің ашық әрі болжамды жұмыс істеуіне мүмкіндік береді. Мемлекеттік басқару нақты әрі өзгермейтін ережелерге сүйенуі керек», – деді сенатор.
Сонымен қатар, жаңа Конституцияда тежемелік әрі тепе-теңдік тетіктері күшейтіліп, Парламенттің рөлі арта түсетіні, ал Конституциялық Соттың мәртебесі нақты айқындалатыны айтылды. Бұл өзгерістер мемлекет пен қоғам арасындағы сенімді арттыруға бағытталған.
Кездесуде «Алатау жарық компаниясы» АҚ Іле ауданы электр тораптары бөлімшесінің басшысы Бекжан Түгелбаев сөз сөйлеп, сала үшін құқықтық тұрақтылықтың маңызына тоқталды.
«Энергетика – ел экономикасының тірегі. Біз тәулік бойы жұмыс істейтін стратегиялық инфрақұрылымды қамтамасыз етеміз. Сондықтан саяси және құқықтық жүйенің тұрақтылығы өндірістік қауіпсіздік пен инвестициялық сенімге тікелей әсер етеді», – деді ол.
Жиын ашық форматта өтті. Қатысушылар әлеуметтік мемлекет қағидаттары, еңбек құқықтарының қорғалуы және стратегиялық нысандардың құқықтық қауіпсіздігіне қатысты сұрақтарын қойды.
Кездесу соңында Алматы облысының энергетиктері алдағы республикалық референдумға белсенді қатысуға дайын екенін білдіріп, елдің болашақ даму бағытын айқындайтын өзгерістерді қолдайтынын жеткізді.
