Сапар барысында өндіріс ошағын 10 гектарға ұлғайту мәселесі қарастырылды.
«Жылыжайдың қазіргі аумағы 9,7 гектар. 1 гектардан 102 келі өнім алып отырмыз. Жылдық қуаттылығы – 9 000 тонна қызанақ пен қияр шығаруға жеткілікті. Ай сайын мемлекетке 15 миллион теңге салық төлейміз. Өнеркәсіп ошағында 248 адам жұмыс істейді. Жылыжай облыс тұрғындарын маусымаралық кезеңде жоғары сапалы жергілікті өніммен қамтамасыз етіп отыр. Тағы да қосымша жеріміз бар. Жоспар бойынша жылжайды тағы да 10 гектарға үлкейтеміз деп ойлағанбыз. Алайда, бұл жобаға инвесторларды тарту керек болып тұр», — деді өндіріс орнымен таныстырған серіктестіктің қаржы директоры Бақыт Сәрсенбаев.
Ал өңір басшысы Марат Сұлтанғазиев болса қажетті мемлекеттік қолдау көрсетілетінін айтты.
«Жылыжай басшылығының жоспары жүзеге асуы үшін қолданыстағы бағдарламалар шеңберінде жағдай жасап, қолдау көрсететін боламыз. Қазіргі таңда облыстың әлеуетін арттыру мақсатында көптеген инвесторлармен келіссөз жүргізіп жатырмыз. Жылыжай мәселесі де назарымыздан тыс қалмайды», — деді облыс әкімі.
Айта кетейік, Қонаев қаласы аумағында жалпы ауданы 18,4 га және өндіріс қуаты жылына 12 мың тоннаға жуық 4 жылыжай орналасқан.
