«Жыл басынан 1 314 адам қаңғыған иттен жарақат алған. Олардың 711-і 14 жасқа дейінгі балалар. 587 иттің иелері бар екені анықталды. Ит пен мысықты ұстау ережелерін бұзғаны үшін полиция инспекторлары 553 азаматты әкімшілік жауапкершілікке тартты. Оның ішінде 367 адамға жалпы сомасы 8,7 млн теңге айыппұл салынды», — деді басқарма басшысы.
Жалпы Алматы облысында биыл бюджеттен қараусыз қалған және қаңғыған жануарларды аулап, емдеуге 108,2 млн теңге бөлінген.
Сонымен қатар Алматы қаласының әкімдігімен екіжақты ынтымақтастық меморандумға қол қойылып, шаһарға жақын жатқан аудандардағы тұрғындардың қауіпсіздігін қамтамасыз ету мақсатында жұмыстар жасалып жатыр.
«Қаңғыған жануарларды аулау, уақытша ұстау және жансыздандырумен айналысатын мекеме тендер арқылы таңдалады. Биыл Райымбек ауданында «Optimus» жеке кәсіпкерлігі конкурсты жеңіп алды. Ал Балқаш, Еңбекшіқазақ, Жамбыл, Қарасай, Іле, Кеген, Талғар, Ұйғыр және Қонаев ветеринарлық стансаларымен тікелей келісім шарт жасалды», — деді Нұртас Қиялбеков.
Басқарма басшысының айтуынша, әр аудан мен Қонаев қаласында ит пен мысықтарды уақытша ұстау үшін арнайы баспаналар салынады. Қазіргі таңда жер телімдері қарастырылған. Енді жобалық-сметалық құжаттарын әзірлеу қажет. Олардың қашан қолданысқа берілетіні әзірше белгісіз.
