2005 жылдан бері жүзеге асып келе жатқан бұл бағдарлама жастарды табиғатты қорғауға, экологиялық сананы қалыптастыруға және еңбекке баулуға бағытталған.
Биылғы маусымда облыстың 9 ауданы мен 2 қаласында 14 пен 35 жас аралығындағы 1000-нан астам жас сарбаз маусымдық жұмыспен қамтылады. Жоба аясында әлеуметтік осал топтағы, көпбалалы отбасылардан шыққан және NEET санатындағы жастарға басымдық берілген.
Жас сарбаздар өңірде абаттандыру және көгалдандыру жұмыстарын атқарады. Оларға арнайы жұмыс киімдері беріліп, еңбекақы төленеді. Бұл бастама «Таза Қазақстан» бағдарламасы аясында ұйымдастырылып отырған экологиялық шаралардың жалғасы болмақ.
Салтанатты ашылу рәсімінен кейін қатысушылар Қапшағай су қоймасының жағалауында тазалық акциясын өткізіп, демалушылар арасында экологиялық мәдениет пен қоршаған ортаны қорғау тақырыбында түсіндіру жұмыстарын жүргізді.
Жоба аясында еңбек еткен жастарға ай сайын орта есеппен 85 мың теңге көлемінде жалақы төленеді. Соңғы үш жылда Алматы облысында «Жасыл ел» қатарында 3 мыңға жуық жас маусымдық жұмыспен қамтылған, оның 70 пайызы – ауыл жастары.
«Жасыл ел» – бұл тек маусымдық жұмыс емес, қоғамға пайдалы іс пен болашақ ұрпаққа жарқын үлгі», – деді Алматы облыстық мәслихат депутаты, тұрақты комиссия төрағасы Нұрдәулет Сұлтан Нұрғайыпұлы.
Салтанатты жиынға Жастар саясаты мәселелері жөніндегі басқарма басшысы Мәди Ахметов және Қонаев қаласы әкімінің орынбасары Төлеген Кенжебеков қатысты.
