Жиынға құқық қорғау органдары мен прокуратура өкілдері, облыстық басқарма басшылары, сондай-ақ аудан және қала әкімдері онлайн форматта қатысты.
Күн тәртібінде электронды темекінің заңсыз айналымының алдын алу, ақша бопсалау деректеріне қарсы шаралар, интернет-алаяқтықпен күрес және кәмелетке толмағандар арасындағы құқық бұзушылықтардың алдын алу мәселелері қаралды.
Облыстық полиция департаменті бастығының бірінші орынбасары Бағдат Әшімов аймақта жасөспірімдер арасындағы құқықбұзушылық деңгейінің төмендегенін атап өтті. Дегенмен, шешімін күткен мәселелердің бар екенін жеткізді. Оның айтуынша, құқық бұзған балалардың жартысына жуығы алдын ала есепте тұрмаған. Бұл білім беру ұйымдарында девиантты мінез-құлықты ерте анықтау жұмыстарының жеткіліксіздігін көрсетеді. Сонымен қатар, тәуекел топтарымен жүйелі жұмыс жүргізудің маңыздылығы айтылды.
Облыстық білім басқармасы басшысының міндетін атқарушы Ақмарал Әтенбекова кәмелетке толмағандарға қатысты құқықбұзушылықтың алдын алу кешенді тәсілді талап ететінін айтты. Басым бағыттардың қатарында мектеп психологтарының жұмысын жетілдіру, сондай-ақ жергілікті атқарушы органдар мен білім ұйымдары арасындағы өзара іс-қимылды күшейту көзделген.
Жиынды қорытындылаған облыс әкімі Қонаев қаласы әкімдігіне, аудан әкімдеріне, облыстық полиция департаментіне және білім басқармасына жүйелі шараларды әзірлеу және іске асыру бойынша нақты тапсырмалар берді.
Сонымен қатар, биылғы жылдың бірінші тоқсанында сыбайлас жемқорлыққа қарсы іс-қимыл мәселелері жөніндегі ведомствоаралық комиссияның алғашқы отырысы өткізілді. Онда ветеринариялық станса қызметі, жер қатынастары саласы және бюджеттік процестердің ашықтығын қамтамасыз ету бағытындағы құқық бұзушылықтардың алдын алу мәселелері қаралды.
Облыс әкімі сыбайлас жемқорлықпен күрес әр мемлекеттік қызметкердің жеке жауапкершілігі екенін атап өтіп, бұл бағыттағы жұмыстар барлық деңгейде жүйелі әрі нәтижелі жүргізілуі тиіс екенін айтты.
