Есте қаларлық ерекше сәттердің бірі — өңірде бұрын соңды болмаған дрондар шоу болды.
Сағат 17:00-де басталған кешкі концерттің сәнін Қазақ эстрадасының жарық жұлдыздары келтірді. Кештің хедлайнерлері – белгілі орындаушылар Esko, Ray және Нұрсұлтан Нұрбердиев болды.
Мерекенің басты кульминациясы – Алматы облысында алғаш рет ұйымдастырылатын ауқымды дрон-шоуы болды.
Бір мезетте көкке 550 дрон көтерілді.
Шоу шамамен 20 минутқа созылды. Онда Республика күні мен тарихи Декларацияға арналған жарық композициялар мен көріністер бейнеленді. Олар: Қазақстан картасы, мемлекеттік Ту, домбыра, Алтын адам, облыстың символы – қар барысы, сондай-ақ Республика күніне арналған логотип және Қапшағай су қоймасын бейнелеген өңірдің ерекше ашық хаты. Шоу соңында аспанда жарқыраған «Қонаев» жазуы пайда болып, мерекенің әсерін одан сайын арттырды. Әсерлі сәтті тамашалауға 15 000-ға жуық адам жиналды.
Облыс әкімдігі атап өткендей, Республика күніне арналған мерекелік іс-шаралар өңірдің барлық аудан-қалаларында өтуде. Облыс тұрғындары мен қонақтары отбасымен келіп, мерекелік көңіл-күйге бөленді.
«Бүгінгі мереке көңілімізді көтеріп, рухымызды асқақтатты. Дрон-шоу өте әсерлі болды. Отбасымызбен осындай үлкен мерекенің куәсі болғанымызға қуаныштымыз. Осындай шаралар жиі өтсе екен», – дейді Қонаев қаласының тұрғыны Болат Сейдахметов.
Қонаевтықтар бұл күнді бірлік пен патриотизмді нығайтатын ерекше мереке ретінде қабылдап, мақтаныш сезімдерімен бөлісуде.
