Кеше елімізде Ұлттық валюта күні – Теңге күні, сондай-ақ қаржы жүйесі қызметкерлерінің кәсіби мерекесіне орай партия филиалында салтанатты шара өтті.
Қаржыгерлерді мерекесімен құттықтаған партия филиалының төрағасы Қуат Байғоджаев ұлттық валюта күнінің қаржы саласы қызметкерлерінің кәсіби мерекесімен тұспа-тұс келуі тегін емес екенін атап өтті.
«Баршаларыңызды Ұлттық валюта — теңгеміздің 30 жылдығымен шын жүректен құттықтаймын! Егемен елдің темірқазығына айналған ұлттық валютаның айналымға түсуі – қоғам өміріндегі аса маңызды оқиға болды. Ұлттық валюта күнінің қаржы саласы қызметкерлерінің кәсіби мерекесімен тұспа-тұс келуі тегін емес. Сіздердің еселі еңбектеріңіз бен білім-біліктіліктеріңіздің арқасында өңіріміздің экономикасы қарқынды даму үстінде. Алдағы уақытта да осынау биік межеден көрініп, ел экономикасының әлеуетін арттыруға күш салады деп сенемін», – деді Қуат Байғоджаев.
Ол өңірде экономикалық өсімді қамтамасыз ету міндеттері оңтайлы шешіліп жатқанын айтты.
«Біздің өңірде экономикалық өсімді қамтамасыз ету және тұрғындардың әлеуметтік тұрмысын жақсарту бағытында қаржылық сауаттылыққа орай алға қойған міндеттер оңтайлы шешілуде. Мәселен, AMANAT партиясы мен Халық банк бірлесе ұйымдастырған «Қарызсыз қоғам» жобасы аясында 8 мыңнан аса облыс тұрғындары өз қаржылық сауаттылығын арттырып үлгерді. Жоба арқылы оң шешілген мәселелер де көп», – деді партия төрағасы.
