Сарқан өзенінің бойын бұрын қалың шөп басып, қоқыс шашылып жатқандықтан, жергілікті тұрғындар мұнда көп келе бермейтін. Ал қазір серуендейтін жол салынып, ескірген көпір жөнделіп, жарықтандырылған соң аумақ көпшіліктің тынығатын сүйікті орнына айналды.
Саябақтың ашылуымен сауда-саттық орыны және балаларға арналған көліктерді, велосипедтерді жалға беретіндер мен түрлі қызмет көрсету орындары жұмысын бастады. Осылайша жергілікті тұрғындар өзін өзі жұмыспен қамтып отыр.
Демалыс орнына балаларға арналған қосымша ойын алаңын салып, өзге де құрылғыларды орнату, парк аумағын ұлғайту жоспарланып отыр.
«Сарқан қаласының әр аудандарында үш жерге балалар ойнайтын алаң, спорт алаңдары салынады. Бұған қоса екі мектептің алаңы заманауи үлгіде жаңартылады», — дейді Сарқан қаласының әкімі Амантай Орынбеков.
Айта кету керек, балалар жылы аясында ауданда аймақтағы балалар мен жасөспірімдердің спортпен шұғылдануына жағдай жасау мақсатында Көкөзек, Қарабөгет, Алмалы сынды жеті ауылда ойын алаңы салынбақ.
