Анасы Алма Ілиясованың айтуынша, Назар үш жасынан Орал қаласындағы FKU Орал (football Kids Uralsk) клубында тәжірибелі бапкер Болат Шалаевтың қоластында жаттықты.
«Әкесі Сергей Доля өткен жылы жазда Сочидегі лагерьге апарып еді. Сонда Испаниядан бапкерлер келіп, қараған кезде Назар бірден көзге түсіп, ұнаған. Сосын сертификат беріп, Валенсиядағы футбол академиясына қаралымға шақырды. Қаралымнан ойдағыдай өтіп, кәсіпқой футбол клубымен екі жылға келісімшарт жасасты», — деді Алма Ілиясова.
Назардың футбол агенті Мария Ковалеваның сөзіне қарағанда, қазақстандық жас спортшы Global Football Total Levante UD академиясында қаралымнан ойдағыдай өтті.
«Назар Global Football Total академиясының базасында қаралымнан өту үшін Испанияға биылғы қаңтар айының аяғында барды. Мұнда басқа клубтар да жас таланттардың ойынын қарайды, сондықтан түрлі ұсыныстар түсуі мүмкін. Назар қазірдің өзінде болашағынан үлкен үміт күттіреді, қалғанын уақыт көрсетеді», — деді ҚазАқпарат тілшісіне Мария Ковалева.
