«16 жастағы баладан алаңдаушылық туғызған хабарлама түсті. Ол өзін Нұр-Сұлтан қаласынан ұрлап алып кетіп, ауылға апарып, күш қолдана отырып, жұмысқа мәжбүрлегенін мәлімдеді», — деп жазды Facebook желісіндегі парақшасына «НеМолчиKZ» қоғамдық қорының басшысы Дина Таңсәрі.
Өз жазбасында белсенді әйел аталған хабарламаны тексеруді сұрап, Ішкі істер министрлігінің «WhatsApp» мессенджеріне өтініш жолдаған. Хабарламада бала өзінің мекенжайы мен аты-жөнін көрсетпей, тек фотосуретін ғана жолдағаны айтылған.
Полиция департаментінің баспасөз қызметі аталған факті бойынша тексеру жүргізіліп жатқанын мәлімдеді. Тәртіп сақшылары жасөспірімнің қайда екенін анықтаған. Белгілі болғандай, ол өз үйінде, ата-анасының жанында.
«Полиция қызметкерлері кәмелетке толмаған баланың қазір Нұр-Сұлтан қаласында өз үйінде және оның аман-есен екенін білді. Мән-жайды тексеру барысында хабарлама таратқан баланың анасы жазғы демалыста ұлын Шығыс Қазақстан облысындағы ауылға туыстарына жібергенін түсіндірген. Жасөспірімге ол жер ұнамағандықтан, ол бұл туралы әлеуметтік желілерге жазған», — деп түсініктеме берді полиция департаментінің баспасөз қызметі.
Баланың анасы арыз-шағым түсіруден бас тартты.
