21 тамыз күні сағат кешкі 7:30 шамасында Жамбыл аудандық ПБ-ға Таран ауылына кіре берісте белгісіз көлік жүргізушісі велосипедтегі зейнеткерді қағып, қашып кеткені туралы хабарлама келіп түсті.
Оқиға салдарынан 81 жастағы ер адам зардап шегіп, Жамбыл аудандық орталық ауруханасына жеткізілді. Ізінше, жол апаты болған жерден түсірілген кадрлар әлеуметтік желіге тарады. Іздестіру нәтижесінде полиция қызметкерлері ЗАЗ Chance автокөлігін басқарған Қарасай ауданының 61 жастағы тұрғынын ұстап, қамауға алды. Көлігі айып тұрағына қойылды.
Құқық бұзушыға қатысты ҚР ӘҚБтК-нің 610-бабының 2-бөлігі (Көлiк құралдары жүргiзушiлерінiң жол жүрісі қағидаларын адамдардың денсаулығына зиян келтiруге, көлiк құралдарының немесе өзге де мүлiктiң бүлінуіне алып келген бұзушылығы), 611-бабының 2-бөлігі (ЖКО орнын қалдыру) және 608-бабының 3-бөлігі (Жүргізушінің көлік құралын алкогольдік, есірткілік немесе уытқұмарлық масаң күйдегі адамның басқаруына беру) бойынша әкімшілік іс қозғалды.
