Полиция департаментінің мәліметінше, Гүлнар Бажкеноваға бірнеше рет жалған ақпарат таратты деген айыппен қылмыстық істер қозғалған. Алдын ала деректерге сәйкес, 2024 жылғы бір материалда құқық қорғау органы қызметкері пара алып жатқан жерінен ұсталды деген ақпарат жарияланған. Алайда департамент мұндай факт болмағанын айтады.
Тағы бір жарияланымда мүліктік дауға қатысты залал көлемі мен себептері туралы бұрмаланған деректер берілгені айтылды. Полиция мұндай ақпарат қоғамды адастырып, өтініш берушінің іскерлік беделіне елеулі нұқсан келтіргенін айтады.
«Бұған дейінгі жарияланымдар бойынша жәбірленушілердің өзге де шағымдары негізінде тергеу жалғасып жатыр. Ол материалдардың ішінде де жалған немесе қоғамды жаңылыстыратын ақпарат болуы мүмкін. Азаматша Б-ның тұрғылықты жерінде және жұмыс орнында тергеу әрекеттері жүргізілуде. Жарияланған жалған мәліметтердің қалай дайындалғанын, қайда орналастырылғанын және олардың қайдан алынғанын анықтау үшін электрондық құрылғылар мен материалдар тәркіленіп жатыр», – делінген ведомствоның хабарламасында.
