Полицейлердің түсіндіруінше, бұл өзгерістердің басты мақсаты – азаматтардың құқықтары мен бостандықтарын, оның ішінде діни сенім бостандығын шектемей, қоғамдық қауіпсіздікті қамтамасыз ету, тұлғаны тану мүмкіндігін сақтау және қоғамдық тәртіпті нығайту.
Учаскелік полиция инспекторлары атап өткендей, тыйым адамның бет-жүзін толықтай жауып, жеке тұлғасын анықтауға кедергі келтіретін киімдерге қатысты. Мысалы, бетперде, никаб және осыған ұқсас тұмшалаушы киімдерге. Ал бет-жүзді жаппайтын хиджаб, шейла, химар, аль-амира секілді киімдерге бұл шектеу қолданылмайды.
Сондай-ақ тыйым ауа райына байланысты немесе медициналық көрсеткіштер бойынша пайдаланылатын киімдерге, Қазақстан Республикасының заң талаптарын орындау кезінде, қызметтік міндеттерді атқару барысында, азаматтық қорғау шараларында, спорттық немесе мәдени-бұқаралық іс-шаралар кезінде киілетін киімдерге жүрмейді.
Түсіндіру жұмыстары аясында полицейлер азаматтарға құқық бұзушылықтар мен қылмыстың алдын алу шараларын да еске салды. Атап айтқанда, интернет-алаяқтықтың кең таралған тәсілдері жайлы айтып, тұрғындарға ондай әрекеттерден сақ болуды ұсынды.
Құқық қорғау органдары қоғамдық қауіпсіздікке төнетін қауіптің алдын алу және заң талаптарын сақтау мақсатында түсіндіру жұмыстарын тұрақты түрде жүргізе беретінін мәлімдеді.
