Ескі банкноттарды айырбастау жалғасады
Маусым айында бірқатар банкноттардың параллель айналым мерзімі аяқталады. Атап айтқанда, 2 000 теңгелік банкноттың айналым кезеңі 24 маусымда, ал 10 000 теңгелік купюраның мерзімі 27 маусымда аяқталады.
Соған қарамастан азаматтар ескі банкноттарды айырбастай алады. Коммерциялық банктер мен «Қазпошта» оларды тағы үш жыл бойы қабылдайды, ал Ұлттық банк филиалдары мерзімсіз айырбастап береді.
Жаңа халықаралық әуе рейстері ашылады
1 маусымнан бастап SCAT әуе компаниясы Шымкент – Санкт-Петербург бағыты бойынша рейстерді іске қосады. Ұшулар аптасына екі рет – дүйсенбі және жұма күндері орындалады.
Ал 3 маусымнан бастап «Россия» әуе компаниясы Астана мен Санкт-Петербург арасындағы тікелей әуе қатынасын қайта жаңғыртады. Рейстер аптасына үш рет орындалады.
Қазақстанға Cirque du Soleil келеді
Маусым айында әлемге әйгілі канадалық Cirque du Soleil циркі Қазақстанда өнер көрсетеді.
Көрермендерге жәндіктер әлеміне арналған OVO шоуы ұсынылады. Қойылым акробатикалық нөмірлерді, тірі музыканы және заманауи визуалды эффектілерді біріктіреді.
Ұлттық банк базалық мөлшерлеме бойынша шешім қабылдайды
5 маусымда Ұлттық банк базалық мөлшерлемеге қатысты кезекті шешімін жариялайды.
Қазіргі уақытта көрсеткіш 18 пайыз деңгейінде тұр. Сарапшылар бұл жолы мөлшерлемені төмендету мүмкіндігін жоққа шығармайды.
Салық құпиясына қатысты жаңа ережелер күшіне енеді
2 маусымнан бастап мемлекеттік органдар арасында салықтық ақпарат алмасудың жаңа тәртібі қолданысқа енгізіледі.
Жаңа ережеге сәйкес, азаматтар мен компаниялардың қосымша келісімінсіз мемлекеттік органдар салық құпиясына жататын мәліметтермен алмаса алады. Бұған жеке шоттар, салық берешектері, есептіліктер, электронды шот-фактуралар, тексеру нәтижелері және өндіріп алу шаралары туралы ақпарат кіреді.
Мамандардың айтуынша, бұл өзгеріс қаржылық ашықтықты арттырып, көлеңкелі экономикамен күресті күшейтуге бағытталған.
Зейнетақы жинақтарына қатысты өзгерістер енгізіледі
Маусым айынан бастап зейнетақы жинақтарын пайдалану кезінде қолданылатын ең төменгі жеткіліктілік шегіне қатысты жаңартылған талаптар күшіне енеді. Бұл өзгерістер азаматтардың зейнетақы қаражатын тұрғын үй жағдайын жақсарту немесе емделу мақсатында пайдалану мүмкіндігіне әсер етуі мүмкін.
