23 маусым күні Кеген ауданы, Түменбай ауылында нөсер жаңбыр салдарынан ауыл көшелерін су басты. Тасқынның салдарынан 1 тұрғын үй, 11 үйдің аулалары суға толды. Оқиға орнына аудан әкімі, Кеген ауылдық округінің әкімі, төтенше жағдайлардың алдын алу бөлімінің қызметкерлері барып, бірнеше техника жұмылдырылды.
«Кеген ауданы Республикалық маңызы бар «Көкпек-Кеген-Түп» — «Жалаңаш-Саты-Көлсай көлі» жолының 10-11 км аралығын су шайып кетті. Аталған учаскеде жол қауіпсіздігін қамтамасыз ету мақсатында төтенше жағдайлардың алдын алу қызметкерлері, ДЭУ-91 мекемесінің өкілдері тарапынан кезекшілік ұйымдастырылып, жол қозғалысы қалпына келтірілді. Қауіпсіздікті қамтамасыз ету мақсатында табиғат салдарынан орын алған жағдайды қалпына келтіру жұмыстары жүргізілуде», — деп хабарлайды Алматы облысы ТЖД баспасөз қызметі
Айта кету керек, апат салдарынан зардап шеккен адамдар жоқ. Қазір комиссия мүшелері аймақты аралап, шығындарды есептеуде.
