Чемпионат 12 наурызға дейін жалғасады. Облыстық додада спортшылар жамбы ату, теңге ілу, көкпар, дәстүрлі садақ ату, құмай тазыны шырғыға тарту бойынша өзара бақ сынасады. Садақ ату сайысына облыс спортшыларынан бөлек, еліміздің бес аймағынан мергендер келді. Жарысқа 200-ге жуық спортшы қатысады.
«Біріншілік ұлттық спортты дәріптеу мақсатында ұйымдастырылды. Доданың өтуіне облыс әкімі Марат Сұлтанғазиев тікелей қолдау көрсетті. Жарыстың жоғары деңгейде өтетініне сенімдіміз», — деді ашылу салтанатында спорт басқармасының басшысы Нұрбақыт Теңізбаев.
Жарыстың өту хронологиясы мынадай:
- 10 наурыз — жамбы ату, дәстүрлі садақ ату, теңге ілу іріктеу кезеңі және финалы, көкпар іріктеу кезеңі, құмай тазыны шырғыға тарту финал.
- 11 наурыз — көкпар ширек финал, жартылай финал ойындары.
- 12 наурыз — көкпар үшінші орын үшін ойын, финал.
Көкпарда үздік 1-орынды иеленген командаларға 1 000 000 теңге ақшалай жүлде қарастырылған, 2-орын – 500 000 теңге, 3-орын – 300 000 теңге. Бұл ойын түрінен бөлек, бақ сынасқандарға 50,30,20 мың теңге сыйақы табысталады.
Ұлттық спорттың ұлықталып жатқанына тұрғындар да дән риза.
«Шонжы шаңдауытты жер болса да, облыстық чемпионаттың дәл осы жерде өтіп жатқанына ризамыз. Бізден кейінгі өскелең ұрпаққа бұл шара үлгі боларлық іс», — деді тұрғын Нақышбеков Рысдәулет.
