Алматы облысында бәсекеге қабілетті кәсіпорындар жұмыс істеп жатыр. Бұл кәсіпорындардың өнімділікті арттыру мен жаңа технологияларды енгізудегі жоспарлары қандай? Облыс әкімі Марат Сұлтанғазиев осы тақырыптарға өз ойымен бөлісті, деп хабарлайды alataunews.kz.
Шағын шаруашылықтар: сақтау мен өңдеуді дамыту қажеттілігі
Облыс басшысының айтуынша, шағын шаруашылықтар тек өнім өндірумен шектелмей, оны сақтау және өңдеу жұмыстарын да жүзеге асыруы қажет. Бұл саланы дамыту – шаруалардың бәсекеге қабілеттілігін арттырудың негізгі жолы.
«Әлемдік нарықта бәсеке үлкен. Егер импорт бағасы төмен болса, біздің шаруаларға қиын болады. Былтыр осындай жағдай болды: Қырғызстандағы әріптестеріміз Ыстықкөл маңында өсірген картопты бізге қарағанда қымбатырақ бағада сатты. Себебі бізде шаруаларға арзандатылған қолдау құралдары бар – жағармай, лизинг және басқа да жеңілдіктер. Бұл біздің өнімдерімізді бәсекеге қабілетті етті. Дегенмен, шаруалар өнімділікті арттыру керектігін түсінеді. Бұл тек жаңа технологияларды енгізу арқылы мүмкін болады,» – деді әкім.
Сақтау мәселесі және шешу жолдары
Марат Сұлтанғазиевтің айтуынша, өткен жылы жүгері мен пиязды сақтау бойынша қиындықтар туындаған. Егер сақтау инфрақұрылымы дамыса, бұл мәселелер болмас еді.
«Біздегі шаруашылықтардың көпшілігі – шағын кәсіпорындар. Олар өздігінен сақтау мен өңдеумен айналыса алмайды, ал ірі шаруашылықтар бұл міндетті жүзеге асыра алады. Сондықтан біздің мақсатымыз – сақтау және өңдеу инфрақұрылымын дамыту,» – деді әкім.
Алматы облысы сусын өндірісі бойынша елдің алдыңғы қатарында. Жалпы елдегі сусындардың 60%-ы осы өңірде өндіріледі. Сондықтан өнім өндірумен қатар, оны сақтау мен өңдеуге ерекше назар аудару маңызды.
Өнімділікті арттыру, сақтау және өңдеу салаларын дамыту Алматы облысының ауыл шаруашылығы мен өндіріс саласының тұрақты дамуына жол ашады. Шаруаларға жаңа технологияларды енгізу мен мемлекеттік қолдау шаралары – өңірдің бәсекеге қабілеттілігін арттырудың басты бағыттары.
