Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров Алматы қаласындағы «Алматы Арена» және «Халық Арена» спорт нысандары мемлекет меншігіне қайта өткенін, бұған дейін бұл нысандар мемлекеттік-жекеменшік әріптестік (МЖӘ) аясында жеке ұйымдарға тегін пайдалануға берілгенін мәлімдеді, деп хабарлайды alataunews.kz.
2017 жылғы Универсиада үшін арнайы салынған бұл мұз айдындары 2019 жылы жекеменшікке өткен еді. Сыбайлас жемқорлыққа қарсы қызмет спортты қаржыландыру саласындағы сыбайлас жемқорлық тәуекелдеріне талдау жүргізіп, спорт және туризм министрлігінің орталық деңгейдегі қызметі мен өңірлік деңгейде спорт және дене шынықтыру басқармаларының жұмысына қатысты мәселелерді анықтады.
Сондай-ақ, Атырау облысында 2018 жылы негізсіз жеке кәсіпкерге берілген Мұз сарайы мемлекетке қайтарылды. Батыс Қазақстан облысында жеке ұйым басқаруындағы футбол алаңы бар стадион да мемлекет меншігіне өтті. Шымкентте 120 миллион теңгеге сатылған Мұз сарайы спорт кешенінің 67% үлесі де мемлекетке қайтарылды, деп мәлімдеді агенттік өкілі.
