Алматы облысы Іле ауданының әкімі өз өкілеттігін асыра пайдаланды деген күдікке ілінген болатын. Бұл оқиға облыс әкіміне қалай әсер етті? Қарауындағы қызметкер істі болса, облыс басшысы отставкаға кете ме? Осындай маңызды сұрақтарға Алматы облысының әкімі Марат Сұлтанғазиев жауап берді, деп хабарлайды alataunews.kz.
Облыс басшысы бұл мәселемен құқық қорғау органдары айналысып жатқанын айтты.
«Аудан әкімі болғандықтан, оның тікелей басшысы ретінде бұл мәселеге араластым. Біз алдын ала талқылау өткізіп, кейін құқық қорғау органдарына тексеру жүргізу туралы хат жолдадық. Сонымен қатар, Президент әкімшілігіне оны жұмыстан босату туралы ұсыныс жібердік», – деді ол.
Марат Сұлтанғазиевтің айтуынша, аудан әкімінің қызметін асыра пайдалануы 2019 жылы кәсіпкерлерге полигонды пайдалануға беру кезінде орын алған болуы мүмкін. Бұл лауазымды тұлға күдікке ілінгенге дейін-ақ қызмет мерзімінің аяқталуына байланысты жұмыстан босатылған еді. Әкім атап өткендей, заң талаптарын барлығы бұлжытпай орындауы керек.
Қазіргі уақытта жаңа аудан әкімін тағайындау бойынша ұсыныстар қаралуда.
