Алматы қаласында 37 миллион теңге көлемінде айыппұл салынған көліктер анықталды. Бұл тізімнің басында шетелде тіркелген Mercedes-Benz көлігінің иесі тұр, деп хабарлайды alataunews.kz Polisia.kz-ке сілтеме жасап.
Mercedes-Benz жүргізушісі жол қозғалысы ережелерін бұзу арқылы 7 миллион теңгеден астам айыппұл жинаған, алайда ешбір төлем жасамаған.
Алматы полициясы құқық бұзушылыққа «мүлдем төзбеушілік» қағидатын және жазаның бұлтартпастығын қамтамасыз ету мақсатында тұрақты рейдтік іс-шаралар өткізеді. Осы шаралар барысында ережені бұзған көлік арнайы айыппұл тұрағына қойылады. Қазақстан Республикасының Әкімшілік құқықбұзушылық туралы кодексіне сәйкес, тәркілеу туралы хаттама толтырылады, ал көлікті айыппұл тұрағынан шығару тек барлық айыппұл төленген жағдайда ғана мүмкін болады, деп мәлімдеді жергілікті полиция қызметінің жедел іздестіру бөлімі.
