Бір жылға жуық іздеуде болған Қарағанды облысы Полиция департаменті Тергеу басқармасының бұрынғы басшысы Рустам Құлкеев ұсталып, тергеу изоляторына қамалды, деп хабарлайды alataunews.kz.
Құлкеевке қатысты іздеу 2023 жылдың желтоқсанында жарияланған еді.
«Жедел-іздестіру шараларының нәтижесінде іздеудегі К. ұсталды. Ол 2023 жылы теріс себептермен Қарағанды облысы ПД Тергеу басқармасының бастығы қызметінен босатылған болатын,» — деп мәлімдеді Ішкі істер министрлігінің баспасөз қызметі.
Рустам Құлкеев қызметтік өкілеттіктерін асыра пайдаланып, қылмыстық іс кезінде тәркіленген майнинг құрылғыларын ұрлады деген күдікке ілінген. Бұрынғы басшыға қатысты «Ұрлық» және «Лауазымдық өкілеттіктерді теріс пайдалану» баптары бойынша қылмыстық іс қозғалған. Оның іздестіріліп жатқаны туралы ақпарат Бас прокуратураның Құқықтық статистика және арнайы есепке алу органдарының сайтында 2023 жылдың 1 желтоқсанынан бері жарияланған.
