Райымбек ауданы, Көмірші ауылында жаңа медициналық пункт ашылып, ауыл тұрғындарының игілігіне қызмет көрсетуге дайын. Жалпы құны 118 миллион теңгеден асатын бұл нысан «Amanat» партиясының сайлауалды бағдарламасы аясында жүзеге асырылды, деп хабарлайды alataunews.kz.
Жаңа медициналық пункттің аумағы 3000 м²-ді құрайды. Ғимараттың өзі 288,55 м² болса, қалған бөлігі көгалдандыру мен қаптау аймақтарына арналған. Заманауи талаптарға сай тікбұрышты, бір қабатты ғимарат 13х18 м өлшемдерімен салынған. Мұнда орта медицина қызметкерлеріне арналған кабинет, егу, процедуралық және акушерлік кабинеттер, санитарлық тораптар, дәріхана пункті және медициналық қалдықтарды уақытша сақтау орындары бар.
Ауыл тұрғындары үшін бұл нысан — алғашқы медициналық көмек көрсету сапасын жақсартып, ауылдағы денсаулық сақтау деңгейін көтеретін маңызды қадам. Көмірші ауылының тұрғыны Е.Нұрмұханбетов: «Биылғы жыл біз үшін қуанышты жыл болды. Ауылымызда заманауи техникамен жабдықталған, кең әрі жайлы медициналық пункт ашылды. Еліміздің болашағы жарқын боларына сенімім мол», — деп қуанышымен бөлісті.
Ауылдағы мектеп мұғалімі Қ.Асанбаева да ауыл тұрғындарының қуанышын бөлісіп: «Бүгін ауылда көптен күткен медициналық пункт ашылды. Жергілікті тұрғындар медициналық көмекке қол жеткізіп, өз ауылында осындай әлеуметтік нысанның пайда болғанына өте риза. Бұл біздің ауылымызға, жалпы елдің дамуына қосылған үлес», — деді.
Көгалдандырылған аумақ пен жайлы жағдайлар медициналық қызметкерлер мен ауыл тұрғындарына қолайлы орта құрып, олардың денсаулығын жақсартуға бағытталған. Жаңа медициналық пункт — ауылдағы өмір сапасын арттыруға және денсаулық сақтау саласының дамуына арналған сенімді бастама.
