Қонаев қаласында 35 жастағы әйелден 4 келі салмақтағы миома алынып, оның өмірі құтқарылды, деп хабарлайды alataunews.kz.
Денсаулық сақтау министрлігінің мәліметінше, науқас қалалық көпбейінді ауруханаға гемоглобин деңгейі төмен ауыр жағдайда түскен. Дәрігерлер шұғыл түрде емдеуге жатқызғаннан кейін, оның жатырында үлкен миома анықтап, лапаротомия және миомэктомия операциясын сәтті жүргізіп, миоманы алып тастады. Бұл операция кезінде жатыр сақталып, миома түйіндері толық алынды.
Емдеуші дәрігер Раушан Әбдуәлиеваның айтуынша, жатыр миомасы кең таралған гинекологиялық аурулардың бірі болып табылады және оның салдары ауыр болуы мүмкін. Аурудың клиникалық көрінісі жасына, аурудың ұзақтығына, ісіктің мөлшері мен орналасуына байланысты өзгеріп, жатырдан қан кету, анемия, ауырсыну және көрші ағзаларға қысым түсуі сияқты белгілерге әкелуі мүмкін.
Қазіргі уақытта әйел үйінде, ол дәрігерлерге алғысын білдірді.
Сонымен қатар, мамандар жатыр миомасының пайда болуына әсер ететін факторлар ретінде гормоналды бұзылулар, аборттар, артық салмақ және дұрыс тамақтанбауды атап өтті. Олар әйелдерді мезгіл-мезгіл тексерулерден өтуге, ультрадыбыстық зерттеулер жасап, гинекологқа қаралып тұруға шақырады.
Операция мен емдеу міндетті әлеуметтік медициналық сақтандыру жүйесі арқылы қаржыландырылды.
