Төтенше жағдайлар министрі Шыңғыс Арынов Павлодар облысындағы Баянауыл ұлттық паркінің аумағындағы дала өрті толық локализацияланғанын мәлімдеді, деп хабарлайды alataunews.kz.
Үкімет отырысында министр өрт сөндіру жұмыстарын үйлестіру үшін министрліктің жедел штабы құрылғанын, сондай-ақ Павлодар облысы Желтау ауылында далалық жедел штабтың жұмыс істеп жатқанын айтты.
«6 қазан күні Қарағанды облысы Қарқаралы ауданында шөп өрті басталып, Павлодар облысындағы Баянауыл ұлттық паркінің шекарасына тарады. Өрт сөндіру жұмыстары вице-министрдің бақылауында. Министрлік күштері мен құралдары дереу жұмылдырылып, қосымша топтар Абай, Ақмола облыстары мен Астанадан жіберілді. Қорғаныс министрлігі мен Ұлттық гвардияның әуе көліктері де жұмылдырылды,» – деп мәлімдеді Шыңғыс Арынов.
Сонымен қатар, министр Павлодар облысы тарапынан дала өртінің толық оқшауланғанын атап өтті.
«Желтау ауылынан 18 тұрғын қауіпсіз жерге эвакуацияланды. Павлодар облысындағы өрт толығымен оқшауланды. Қарағанды облысында да осындай нәтижеге қол жеткіземіз деп күтеміз. Барлық қажетті шаралар қабылдануда,» – деді министр.
Сонымен қатар, ол Ресейден Қостанай облысының Жетіқара ауданына тараған дала өртін сөндіру жұмыстары сәтті аяқталғанын және қазіргі жағдайдың тұрақталғанын айтты.
