Қазақстандықтар енді eGov.kz порталында «Көлік тарихы» сервисінің көмегімен автокөліктің иелік ету тарихы туралы толық ақпаратты тексере алады. Бұл сервис көлік сатып алу алдында оның тарихын тексеруге мүмкіндік береді, деп хабарлайды alataunews.kz.
Сервисті енгізу көліктің жағдайы мен өткен тарихы туралы қосымша ақпарат алуға және сәйкессіздіктер болған жағдайда мүмкін болатын проблемалардан сақтануға көмектеседі. Тексеру үшін көліктің мемлекеттік нөмірі мен техникалық паспорт нөмірін білу қажет.
«Көлік тарихы» сервисі арқылы келесі мәліметтерді білуге болады:
- автомобиль маркасы және шығарылған жылы;
- қозғалтқыш көлемі, шанақтың түсі және қосымша жабдықтар;
- Қазақстан аумағында алғашқы тіркелу күні;
- автокөлікті қайта тіркеу күндері (меншік иелері туралы дербес деректерсіз);
- алдыңғы иелердің жалпы саны;
- көлікке қатысты кепіл немесе ауыртпалықтардың болуы.
Сервисті пайдалану үшін:
- eGov.kz порталына кіріп, «Көлік тарихы» сервисіне өтіңіз;
- автомобильдің мемлекеттік нөмірі мен тіркеу куәлігі нөмірін енгізіңіз;
- көлік туралы мәліметтермен танысыңыз.
Бұл қызмет ҚР Ішкі істер министрлігі, ҚР Цифрлық даму, инновациялар және аэроғарыш өнеркәсібі министрлігі және «Ұлттық ақпараттық технологиялар» АҚ арасындағы ынтымақтастық аясында іске қосылған.
