Қонаев қаласында патрульдік полиция қызметкерлері кәріз құдығына құлап кеткен жылқыны құтқарды, деп хабарлайды alataunews.kz.
Оқиға облыс орталығындағы жеке тұрғын үйлердің бірін патрульдеу барысында анықталған. «Бүркіт-253» патрульдік тобының полицейлері Ернар Омаров пен Айбек Тұрсынов құдыққа түсіп кеткен жануарды байқап, дереу құтқару шараларын бастаған.
Құтқару операциясы жануардың ірі көлемі мен салмағына байланысты қиындық туғызды. Алайда «Бүркіт-253» және «Бүркіт-261» патрульдік топтарының қызметкерлері Дархан Есімханов пен Серік Ордабаевтың үйлесімді әрекеттерінің арқасында жылқы аман-есен құдықтан шығарылды. Барлық операция жануарға зиян келтірмеу мақсатында үлкен сақтықпен жүргізілді.
Құтқарылған жылқы иесіне табысталғаннан кейін, иесі полицейлерге жылдам әрекеттері мен кәсіби шеберліктері үшін алғыс білдірді.
«Біздің міндетіміз тек тәртіпті сақтау ғана емес, мұқтаждарға көмек көрсету. Осындай сәттерде жұмысымыздың маңызды бір бөлігі – адамдарды ғана емес, көмекке зәру жануарларды да қорғау екенін түсінеміз,» – деді Ернар Омаров.
