Ертең, 6 қазан атом электр станциясын (АЭС) салу мәселесі бойынша референдум өтеді. Энергетика министрі Алмасадам Сәтқалиев халықты алаңдатқан бірнеше сұраққа отандық БАҚ-тардың біріне берген сұхбатында жауап берген екен. Негізгілерін ұсынамыз.
Министр АЭС құрылысы Қазақстанның энергетикалық тәуелсіздігін нығайтатынын, егер станция салынса, ел көршілес мемлекеттерден электр энергиясын сатып алуға мәжбүр болмайтынын айтады.
Оның айтуынша, Қазақстан уран өндіруде әлемде бірінші орында тұр.
«Ел уранды экспорттаудың орнына оны өз мүддесіне, болашақ ұрпақтар мен өнеркәсіп үшін пайдалануы керек. Қазақстанда толық технологиялық цикл бар, уран өнімдерінен басқа, жылу бөлетін жинақтар да өндіріледі. АЭС елдің энергетикалық қажеттіліктерін қамтамасыз етудің маңызды бөлігі болып табылады, себебі Қазақстан көршілес мемлекеттерден электр энергиясын сатып алуға мәжбүр. Сондықтан, жаңа, тиімді және тұрақты энергия көздерін дамыту қажет», — дейді министр.
Ол, сондай-ақ, АЭС-ке қызмет ететін мамандар тапшылығы болмайтынын айтты. Қазақстанда ядролық энергетика саласында жұмыс істейтін дайын кадрлар жеткілікті, олардың ішінде Ядролық физика институты мен Ұлттық ядролық орталық мамандары бар.
«Қазіргі уақытта бірнеше қазақстандық жоғары оқу орындары «Ядролық инженерия», «Ядролық физика» мамандықтары бойынша мамандар даярлап жатыр», – деді ол.
