Қазақстанның Сыртқы істер министрлігінің (СІМ) ресми өкілі Таяу Шығыстағы қақтығыс аймақтарындағы қазақстандық азаматтардың саны туралы мәлімдеді, деп хабарлайды alataunews.kz.
«Консулдық есептегі азаматтардың тізімі үнемі жаңартылып отырады. Қазіргі таңда Израильде консулдық есепте – 120, Иранда – 102, ал Ливанда – 132 Қазақстан азаматы бар, оның ішінде дипломаттар мен олардың отбасы мүшелері де кіреді», – деді СІМ ресми өкілі Айбек Смадияров.
Сонымен қатар, ол көптеген азаматтардың консулдық есепте тұрмайтынын айтып, оларға үндеу жасады.
«Көптеген азаматтар консулдық есепке тіркелмеген. Сондықтан олармен байланыс орнату және тізімді нақтылау біраз уақытты қажет етеді. Осы мүмкіндікті пайдаланып, аталған елдердегі барлық Қазақстан азаматтарын консулдық есепке тұруға шақырамыз», – деді Айбек Смадияров.
