Қазақстанда жоғары оқу орындары, колледждер және мектептерге қойылатын санитарлық талаптар өзгертілді. Бұл жаңартулар 2024 жылғы 25 қыркүйекте Денсаулық сақтау министрінің бұйрығымен енгізілді, деп хабарлайды alataunews.kz.
Жаңа санитарлық ережелер білім беру мекемелерінің құрылысын жобалау, сумен жабдықтау, жарықтандыру, желдету, тамақтандыру, еңбек жағдайлары мен медициналық қызмет көрсету секілді көптеген аспектілерге қатысты талаптарды қамтиды.
Негізгі өзгерістер:
- Оқу кабинеттері мен аудиториялардың ауданы бір оқушыға бөлінетін орын көлеміне қарай анықталады. Мысалы, 12-15 орынға кемінде 2,5 м², ал 350 және одан да көп орынға бір оқушыға 1 м² бөлінеді.
- Санитарлық тораптар жаңа талаптарға сай жабдықталады. Оларға дәретхана қағазын ұстағыштар, қол жуғыштар және қоқыс жәшіктері орнатылады. 2025 жылдың 1 қыркүйегінен бастап санитарлық тораптар ҚР СТ 3845-2023 ұлттық стандартына сай болуы тиіс.
- Ұйықтайтын бөлмелердегі алаң бір төсекке кемінде 4 м² болуы керек, ал ерекше қажеттіліктері бар балаларға арналған интернаттарда бұл көрсеткіш 4,5 м² дейін ұлғайтылады.
- Техникалық және кәсіптік білім беру мекемелерінің жатақханаларында бір адамға кемінде 6 м² бөлінуі қажет. Сонымен қатар, 4-6 адамға арналған бір душ, бір қол жуғыш және бір дәретхана болуы міндеттеледі.
Бұл талаптар 2024 жылғы 9 қазанда күшіне енеді және білім беру мекемелерінің санитарлық жағдайын жақсартуға бағытталған.
