ҚР Ұлттық экономика министрлігі Табиғи монополияларды реттеу комитетінің Алматы облысы бойынша департаменті басшысының орынбасары Гүлмира Сейтбекқызы 2024 жылы атқарылған жұмыстар туралы есеп берді, деп хабарлайды alataunews.kz.
Жыл басынан бері 325 тарифтік өтінім қаралса, оның 204-і талаптарға сай болмағандықтан қабылданбады. Дегенмен, 55 жаңа тариф бекітіліп, нәтижесінде тұрғындарға 117 миллион теңге қайтарылды. Сонымен қатар, жылу есептегіш құрылғылары жоқ тұтынушыларға 18 миллион теңге өтемақы төленген.
Тарифтерді есептеу жүйесінде де өзгерістер орын алды. Енді су тұтыну көлеміне байланысты төлем мөлшері өзгереді. Мысалы, айына 3 текше метрге дейін су пайдаланатын тұтынушылар ең төменгі тариф бойынша төлем жасаса, 3-тен 5 текше метрге дейінгі көлемде су тұтынатындар 20%-ға жоғары тарифпен есеп айырысады. Егер тұтыну көлемі 5-тен 10 текше метрге дейін болса, тариф 50%-ға өседі, ал 10 текше метрден асқан жағдайда ең жоғары тариф қолданылады. Бұл жүйе отбасыларды су ресурстарын үнемдеуге ынталандырады.
Сонымен бірге, тарифтік реформалар инфрақұрылымдық жобаларды жүзеге асыруға мүмкіндік беріп отыр. 2024 жылы қолға алынған жобалар аясында инженерлік желілер жаңартылып, қызмет сапасы жақсаруда. Жиналған қаражат желілердің тозуын азайтуға, жаңа құрал-жабдықтар сатып алуға бағытталуда.
«Тарифтік өзгерістер тек бағаны реттеумен шектелмей, қызмет сапасын арттыруды да көздейді. Инвестицияларды тиімді пайдалану арқылы біз инфрақұрылымды жаңартып, тұтынушыларға көрсетілетін қызметтің сапасын жақсартудамыз,» – деп мәлімдеді Гүлмира Сейтбекқызы.
