Алматы облысында жол қозғалысы қауіпсіздігін арттыру бағытында ауқымды жұмыстар жүргізілуде. Бұл туралы Алматы облысы ПД Әкімшілік полиция басқармасының бастығы, полиция подполковнигі Еркебұлан Ахметов баспасөз мәслихатында мәлімдеді, деп хабарлайды alataunews.kz.
Ахметовтің айтуынша, жол қауіпсіздігіне қатысты шаралар жыл басынан бері үздіксіз жүргізіліп келеді. Ағымдағы жылы облыс аумағындағы 1404 жолға тексеру жүргізіліп, анықталған кемшіліктерді жою үшін жол жөндеу мекемелеріне тиісті нұсқамалар берілген.
«Тексеру нәтижесінде 272 мекеме мен жауапты тұлғалар әкімшілік жауапкершілікке тартылды,» – деді Еркебұлан Ахметов.
Жол қауіпсіздігін қамтамасыз ету жұмыстары мұнымен шектелмейді. Облыста 4252 жаңа жол белгісі орнатылып, 16 бағдаршам іске қосылды. Жаяу жүргіншілер өткелдерінде де қауіпсіздік күшейтіліп, 12 өткелге жарық шамдары орнатылып, қосымша жасанды кедергілер жасалған.
Сондай-ақ, білім беру мекемелерінің маңындағы жол қауіпсіздігіне де ерекше көңіл бөлінген. Жаңа оқу жылы қарсаңында 476 мектеп пен 1161 мектепке дейінгі мекеме жанындағы жолдардың жағдайы тексеріліп, олардың қауіпсіздігі жақсартылған.
Бұл бағыттағы жұмыстар алдағы уақытта да жалғасатын болады.
