Қазақстанға соңғы екі аптада келген шетелдік туристердің саны жарты миллионнан асты, деп хабарлайды alataunews.kz.
2024 жылдың 1-13 қыркүйек аралығында өткен іс-шаралардың нәтижесінде Қазақстанға 597 мың шетелдік турист келді. Олардың 68 мыңы Астана мен Алматы халықаралық әуежайлары арқылы келсе, қалғандары автокөлік және теміржолмен келген. Туристер санының артуына Дүниежүзілік көшпенділер ойындары мен танымал әнші Димаш Құдайбергеннің концерті үлкен әсер етті. Бұл шараларға 89 мемлекеттің азаматтары қатысты.
«Шетелдік қонақтардың басым бөлігі Қытай, Ресей, Үндістан және Германия елдерінен келген. Қытайдан 8 мыңнан астам, Үндістаннан 6 мыңнан астам, ал Германиядан 4 мыңнан астам турист тіркелген. Бұл деректер Қазақстанның туристік бағыт ретінде танымалдығының артып келе жатқанын көрсетеді,» – деді Туризм және спорт вице-министрі Ержан Еркінбаев.
Вице-министрдің айтуынша, туристердің көпшілігі Германия, Өзбекстан, Түркия, Қырғызстан, АҚШ және Оңтүстік Кореядан келген. Астанада EQonaq жүйесі арқылы 12,4 мың шетелдік турист тіркеліп, олардың шығындары 15,5 млн АҚШ долларын немесе 7,5 млрд теңгені құрады. Алыс шетелден келген туристердің орташа шығыны 1500 долларды құрайды, ал Дүниежүзілік көшпенділер ойындарына қатысқан туристер ел экономикасына 625 мың АҚШ долларын қосқан.
Сонымен қатар, елордадағы туристік нысандарға келушілер саны да артты. 7-13 қыркүйек аралығында Қазақстанның Ұлттық музейі 14 мыңнан астам адамды қабылдаса, «Астана-Бәйтерек» монументіне 15 мыңға жуық, ал «Нұр-Әлем» павильонына 10 мыңға жуық турист келген.
Дүниежүзілік көшпенділер ойындары Қазақстанның туристік имиджін нығайтуға елеулі үлес қосты. Ұйымдастыру комитетінің мәліметінше, этноауыл мен ойындарды тамашалауға 250 мыңнан астам адам келген.
