Қазақстанда биыл 1 қыркүйек пен 1 қараша аралығында емханаларға тіркелу науқаны өтіп жатыр. Осы кезеңде облыс тұрғындары өздерінің емханаларын ауыстыруға мүмкіндік алады. Бұл туралы Алматы облысының денсаулық сақтау басқармасы мен «Әлеуметтік медициналық сақтандыру қорының» Алматы облысы бойынша филиалы мәлімдеді, деп хабарлайды alataunews.kz.
Алматы облысы денсаулық сақтау басқармасы басшысының орынбасары Лейла Пернебаева емханаларға тіркелу науқанының маңыздылығын атап өтті. Оның айтуынша, бұл науқан азаматтарға кепілдендірілген тегін медициналық көмек пен міндетті әлеуметтік медициналық сақтандыру (МӘМС) аясында қажетті қызметтерді алу үшін тіркелу мүмкіндігін береді.
Биыл науқанға 34 емхана қатысуда, оның ішінде 13-і мемлекеттік, ал 21-і жекеменшік. Бұл емханалар 2024 жылдың 1 қаңтарынан бастап МӘМС және тегін медициналық көмектің кепілдік берілген көлемі (ТМККК) аясында қызмет көрсетеді.
Филиал директоры Тілеухан Әбілдаевтың айтуынша, облыс бойынша МӘМС жүйесінде 1 242 622 адам сақтандырылған, бұл тұрғындардың 81,2%-ын құрайды. Сақтандырылған азаматтар профилактикалық тексерулер, диагностика, стоматологиялық көмек, медициналық оңалту және стационарлық емдеу қызметтерін ала алады. Сақтандырылған мәртебеге ие болу үшін соңғы 12 ай немесе алдағы 12 айға төлемдер төленуі тиіс.
2019 жылдан бері емханаға тіркелу электронды үкімет порталы арқылы жүзеге асырылып келеді, бұл азаматтарға емхананы еркін таңдау және медициналық қызметтердің қолжетімділігін арттыру мүмкіндігін береді.
Пернебаева емханаға тіркелу әрбір азаматтың денсаулығын тиімді басқаруға және медициналық көмекке қолжетімділігін қамтамасыз етуге ықпал ететінін айтты. Тіркелу науқанына белсенді қатысу арқылы тұрғындар сапалы медициналық қызметтерге қол жеткізу мүмкіндігін арттыра алады.
