Кеген ауданына қарасты мал шаруашылығында 61 мыңнан астам ірі қара мал басы бар, оның 27 мыңы сиыр. Жылына орта есеппен 27 мың тонна сүт алынады. Ауданда қуаттылығы 400 бас сиырды ғана қамтитын биыл ашылған жалғыз сүт-тауар фермасы бар. Оның нақты жүктемесі 25%-ды ғана құрайды.
Сонымен қатар өңірде 37 мың бас жылқы және 243 мың бас қой мен ешкі бар. Мал басының облыс деңгейінде үлесі жоғары болғанымен, аудан көлемінде ет өнімдерін шығыратын екі кәсіпорын ғана бар.
«Қазіргі күні жылына 7 мың тонна ет өнімдерін шығаратын «Meat Processing and Service» компаниясы және «Қазмясо» компаниясы қуаттылығы 6 мың бас асыл тұқымды ірі қараны қамтитын толық циклді жоғары технологиялық кәсіпорын жұмыс істеп тұр», — деді облыс әкімі Марат Сұлтанғазиев.
Кеген ауданының мал шаруашылығы жағынан облыстағы үлесі 8%, алтыншы орында тұр. Марат Сұлтанғазиев жергілікті билік өкілдеріне саланы жандандыру бойынша бірқатар тапсырмалар берді.
