Спикердің айтуынша, осы жерлердің 72,7 мың гектары мемлекет меншігіне қайтарылып, 46,3 мың гектар жер қайтадан ауыл шаруашылығы мақсатында пайдалануға берілді.
Абдрахмановтың ақпарынша, 22,6 мың гектар жерге қатысты сот процестері әлі де жалғасуда, ал иелері анықталмаған 2,7 мың гектар жер иесіз мүлік ретінде тіркелген. Қазіргі уақытта 129,8 мың гектар жер учаскелері жергілікті атқарушы органдардың қарауында. Бұл жерлерді тиімді пайдалану және экономикалық айналымға тарту үшін қосымша шаралар қабылдануда, деп атап өтті спикер.
Сонымен қатар, жайылымдық жерлерді қамтамасыз ету де маңызды бағыттардың бірі болып табылады. Қазіргі уақытта облыс бойынша 669,9 мың гектар жайылымдық жер ауыл тұрғындарының мал жаюы үшін бөлінген. Бұған қосымша, ауыл шаруашылығы мақсатындағы 763,4 мың гектар босалқы жерлер, 429,5 мың гектар орман қорының жерлері және 195,9 мың гектар ерекше қорғалатын табиғи аумақтар да пайдаланылуда.
«Жалпы алғанда, облыста мал жаю үшін 2,1 миллион гектар жайылымдық жер қолжетімді,» – деді Аманжол Абдрахманов.
Бұдан бөлек, спикер мемлекет мұқтажы үшін жер учаскелерін сатып алу жұмыстарының жүргізіліп жатқанын айтты. Мысалы, «Жетіген-Қазбек-Бек» темір жол құрылысы үшін 84 жер учаскесі және «Алматы – Байсерке — Талғар» магистральдық газ құбыры жобасы үшін 96 жер учаскесі сатып алынады. Бұл жобалар өңірдің инфрақұрылымын дамытуға және экономикасын нығайтуға бағытталған маңызды қадамдар ретінде қарастырылып отыр, деп қорытындылады спикер.
