Бұл кездесу спортшының жақында Олимпиадада күміс жүлде алуына арналған және оның спорттық мансабының маңызды кезеңдерін қарастыру мақсатында ұйымдастырылды.
Демеу Жадыраев өз сөзінде спорттағы жетістіктің құпиясмын бөлісті.
«Өзіңді жеңбей, өзгелерді жеңе алмайсың. Спортта табысқа жету үшін алдымен өзіңмен күресіп, өзіңді жеңу керек. Менің үлкен спортқа келуіме алғашқы бапкерім Жұмахан Тұрғанбековтың еңбегі орасан. Спортшы болу үшін ең алдымен, спортқа деген шынайы сүйіспеншілік, темірдей тәртіп және жеңіске деген жігер керек. Жаттықтырушының әрбір кеңесін тыңдап, тапсырмаларды толық орындау арқылы ғана биік мақсаттарға қол жеткізуге болады», – деді спортшы.
Сонымен қатар, ол өз отбасының спорттық мансабындағы маңызды рөлін ерекше атап өтті.
«Әйелімнің моральдық қолдауы менің жетістіктерімнің негізі болды. Оның сенімі мен қолдауы маған үлкен күш беріп, әрдайым алға жылжуыма көмектесті. Спорттық мансабымдағы қиын кезеңдерде ол менің ең үлкен қолдаушым», – деп атап өтті Демеу Жадыраев.
Кездесуге шақырылған қонақтар қатарында Демеу Жадыраевтың бапкері Боранбек Қоңыратов және Алматы облысының спорт басқармасының басшысы Ерболат Сарабеков болды. Олар өз сөздерінде Демеу Жадыраевтың Олимпиададағы жетістігі мен оның Қазақстан спортына қосқан үлесін ерекше атап өтті.
«Демеу Жадыраевтың Олимпиада ойындарында күміс жүлде алуымен Алматы облысының спорт саласындағы жоғары деңгейі тағы да бір дәлелденді. Бұл өңіріміздің спорттық жетістіктерін әлемге танытты. Сонымен қатар, өңірден олимпиадаға стенд атудан Әсем Орынбай, Едуард Ещенко және Дмитриенко Мария, оқ атудан Чирюкин Никита қатысып, өнер көрсетті. Алматы облысының әкімі спортшылардың барлық жағдайын жасауға ерекше көңіл бөліп, оларға қолдау көрсету мақсатында көптеген шаралар қабылдады», – деді Ерболат Сарабеков.
Кездесу соңында Демеу Жадыраев барлық жанкүйерлеріне, жаттықтырушыларына және қолдаушыларына шынайы алғысын білдірді.
