Alataunews.kz ақпарат агенттігі Алматы облысында жайылымды жалмаған белгісіз қара құрттың қайдан шыққанын анықтап, күресу жолдарын арнайы мамандардан сұрап көрді.
Бізге Қазақ өсімдіктерді қорғау және карантин ғылыми-зерттеу институтының энтомологы және өсімдіктерді интеграцияланған қорғау бөлімінің энтомология зертханасының жетекші ғылыми қызметкері Темрешев Ізбасар Исатайұлы жауап берді.
Осы саланың жілігін шағып, майын ішіп отырған маманның айтуынша, бұл – рапс жапырағының жемірі. Қара түсті құрттар аталған қоңыздың дернәсілі екен.
«Егер оларды қазір арнайы препараттармен өңдемесе, қыркүйек айында бұлар қоңызға айналып ұшып, бұдан үлкен алқаптарды алуы мүмкін. Оның үстіне, дернәсілі де қоңызы да қауіпті бұл жәндік өсімдік талғамайды, алдындағының бәрін отай береді», — дейді Ізбасар Исатайұлы.
Энтомологтың мәліметінше, зиянкеспен күресу үшін актарофит, энтолек плантеко к немесе битоксибациллин биологиялық препараттарын қолдану қажет. Неге биологиялық? Себебі, химиялық препаратты пайдалану, зиянкеске ғана емес қоршаған ортаға да зиянын тигізеді. Бұл қара құрттан осылай ғана қорғана аламыз дейді.
