Мобильді құрылғы науқастарға емдеу мекемелерінен тыс жерде, яғни оқиға орнында немесе жедел жәрдем көлігінің ішінде зерттеу жасауға қолайлы. Заманауи құрылғылар «Philips Foundation» халықаралық коммерциялық емес ұйымы мен «Сәби» қорының қайырымдылық жобасы аясында алынған.
Талғар аудандық орталық ауруханасы үш күн бойы Алматы және Жетісу облысынан келген дәрігерлердің оқу орнына айналды. «Philips Foundation» халықаралық коммерциялық емес ұйымы мен «Сәби» қоры емдеу мекемелеріне мобильді ультрадыбыстық құрылғыны тапсырды.
«Мобильді ультрадыбыстық аппаратпен 3-5 минуттың ішінде науқасқа диагностика жасап, жағдайын біле аламыз. Осындай медициналық жабдықты қолдану диагностикамен бірге емдеуді де жеңілдетеді», — деді «Филипс Қазақстан» ЖШС денсаулық сақтау жобаларының жетекшісі Жанетдин Шутанов.
Акушер-гинекологтар, анестезиологтар, травматологтар, кардиологтармен басқа да дәрігерлер жүйені қызыға зерттеп, өз бағаларын берді.
«Ерекше аппараттың біз үшін пайдасы көп. Әсіресе көп жарақат алған кезде қажет. Қазір ультрадыбыстық зерттеу FAST-хаттамасы бойынша қалай жасалатынын көре аласыздар. Яғни көп жарақатпен ауруханаға түскен пациентті бірден қабылдау бөлімінде тексере аламыз», — деді дәрігер-хирург, хирургия бөлімінің жетекшісі Нұрлыбек Омаров.
«Әлеуметтік маңызды жобаларды іске асыруда тәжірибесі мол Philips Foundation ұйымының енді біздің аймақта медициналық көмек сапасын жақсартуға атсалысып отырғанын жоғары бағалаймыз», деді облыстық денсаулық сақтау басқармасының басшысы Ләззат Ақтаева.
