Өмірдің философиясын өлеңмен өріп, қара сөзімен жеткізген һәкім Абайдың даналығы сан толқынды тәрбиеледі.
Оның өміршең шығармалары ғасыр жасап, ән мен арнайы композицияларға айналғаны ақиқат.
Алматы облыстық Сүйінбай атындағы филормониясының ұйымдастырумен өткен концертте ақынның бір дәуірге арқау болған шығармаларын әнге қосып, домбыраның қос ішегінде орындалды.
Атап айтсақ, Абайдың «Сегіз аяқ»,«Көзімнің қарасы», «Желсіз түнде жарық ай», «Айттым сәлем, Қаламқас» сынды танымал өлеңдеріне жазылған әндері Қонаев аспанын тербеді.
«Бүгін қаламызда Абайдың туған күніне орай концерт өтті. Халық есті әндерді естіп бір серпіліп қалды. Қазағымыздың қара сөзі мен дария ақылымен болашаққа бағдар берген ақынымыздың ұлтқа берген өнегесін ұмытпауымыз керек», — дейді қала тұрғыны Салтанат Құдайберген.
Осылайша, қазақтың арайлы таңы үшін қам жеген алаштың арда перзентінің ұлықталуы көпке рухани азық сыйлады.
