«Өткен демалыс күндері елімізде 80-нен астам жол-көлік оқиғасы болып, 20-дан астам адам қаза тапты. Жол апаттарының жиілеуіне байланысты Ішкі істер министрлігі жол қозғалысы қауіпсіздігі айлығын өткізуді ұйғарды. Бірінші кезекте жолаушыларды тасымалдаумен айналысатын қоғамдық көліктер тексеріледі. Яғни, автобустар, микроавтобустар, минивэндер, такси жүргізушілері. Тексеру кезінде бес орындық көлікке 7-8 адам отырған жағдайлар кездесті», — деді Жандос Мұратәлиев.
Оның айтуынша, жол-патруль полициясы түнгі уақытта рейдта көп жүретін болады. Себебі, жол апаттары қараңғы түскенде орын алады.
Сонымен бірге, Жандос Мұратәлиев бірқатар жол апатын тексергенде тежегіш ізінің жоқтығы анықталғанын, бұл жүргізушілердің көлікте ұйықтап кеткенін білдіретінін айтты. Осы себепті соңғы уақытта 8 адам қаза тауып, 9 адам жарақат алған. Сондықтан, көлікті тоқтатқан полиция қызметкерлері жүргізушінің жай-күйіне сапарды жалғастыра алатынына, көліктің қауіпсіздік талаптарына сәйкестігіне, жолаушылар санына және басқа да мәселелерге назар аударады.
