Қасымбек ауылындағы «Айтқали Био Гарден» серіктестігі 2017 жылы 25 гектар жерге алма көшеттерін еккен. Араға 3 жыл салып 100 тонна өнім алған. Бұл бақта алманың луна, розелла, лорион, ретопаз, сириус түрлері өсіріледі. Оның бір түрі ғана маусым айында піседі. Піскен алма көтерме бағамен алып-сатарларға саудаланады.
«Үсік пен суықтан аман-есен шықтық. Былтыр 60 тонна өнім алдық. Биыл да сол межеден асып түспесек, кем түспейміз. Сіздер тұрған 25 гектар жерден басқа 5,5 гектар жерге апорт еккенбіз. Алдағы 2-3 жылда сол бақтан өнім аламыз. Жалпы бақтың аумағын 100 гектарға дейін ұлғайтуды жоспарлап отырмыз», — деді серіктестіктің агроном маманы Нұрдәулет Жиенбеков.
Агрономның айтуынша, бақтың басшылығы бірнеше рет мемлекеттік қолдауға жүгінген. Ол жағынан мәселе жоқ.
Айта кетейік, Жамбыл ауданында сыйымдылығы 1,5 мың тонна болатын 2 көкөніс қоймасы орналасқан. Бұдан бөлек, көлемі 8,6 гектар болатын 8 жылыжай бар. Биыл 9,8 млрд теңгеге ауыл шаруашылығы өнімі өндірілді.
