Мысалы, 20 мамыр күні таңертең жылы болып тұрды да, түс қайта дауыл соқты. «Қазгидромет» мамандарының алдын ала жариялаған деректері бойынша Қонаевта желдің жылдамдығы 15-20 м/с-қа дейін жетіп, жаңбыр жауды, ал облыстың таулы аудандарында 24-29 м/с-қа дейін ұлғайды.
Нәтижесінде Қонаевта 2-3 ш/а-да ағаш құлап, электр сымдарына, тұрақтағы 3 көлікке зақым келтірді. Қаладағы кей көпқабатты үйлерде жарық өшті. Шаһардың тұрғын үй-коммуналдық шаруашылық бөлімі (ТҮКШ) құлаған ағаштарды кесіп, жолды ашты. Әзірше, көліктерді кім қалпына келтіріп беретіні белгісіз.
«Автокөлік иелері әкімдікке арызданса, мамандар ағаштардың пәтер иелері кооперативінің не ТҮКШ балансында болғанын анықтайды. Содан кейін ғана көлік иелері өтемақы алуы мүмкін. Бірақ, бұл ұзаққа созылады. Мұндайда сақтандыру компаниялары көлік иелеріне көмектесуі тиіс. Алайда, бұл біздің құзіретіміздегі іс болмағандықтан, нақты ештеңе айта алмаймыз», — деді Қонаев қаласы әкімдігінің баспасөз хатшысы Екатерина Колесниченко.
Ал қала маңында орналасқан әскери қалашықтағы көпқабатты үйдің бірінің шатыры ұшып кеткен. Араға 30 минут салып, қалашықтың коммуналды жұмыстарына жауаптылар шатырды қалпына келтіре бастады.
Абырой болғанда, жоғарыда аталған жағдайлардан зардап шеккендер мен қаза тапқандар жоқ.
